الكمبيوتر الذكي
مؤسسة سعد الخثلانمساحة إعلانية
سوق رحيمة الإلكتروني
العودة   منتديات رحيمة > واحة رحيمة > رحيمة في ذاكرتهم
رحيمة في ذاكرتهم لقاءات مع ضيوف منتديات رحيمة
 
 
أدوات الموضوع انواع عرض الموضوع
قديم 18 / 03 / 2010, 31 : 02 PM   #1
مراقب عام
 
تاريخ التسجيل: 29 / 01 / 2005
رقم العضوية: 1049
المشاركات: 154
إدارة المنتدى is on a distinguished road
لقاء الوالد " سلطان بن درويش" وحديث الذكريات !!


لقاء ومقابله الوالد " سلطان بن درويش الهاجري " وحديث الذكريات

لقاء الوالد " سلطان درويش"


سواليف رحيمة ..شعاب وشعيب !!!


صور من شعّيب

لقاء الوالد " سلطان درويش"

لقاء الوالد " سلطان درويش"

لقاء الوالد " سلطان درويش"

لقاء الوالد " سلطان درويش"


==================


لحظه الاستقبال من الوالد عند باب منزلة



لقاء الوالد " سلطان درويش"

لقاء الوالد " سلطان درويش"



الوالد " سلطان بن درويش الهاجري " يتذكر .....


رحيمة يا بوك ورأس تنوره مدخل واحد تدش رحيمة ومحل ماتدش تطلع منها ...من جنوبيها وشرقيها وقبليها البحر وكانت حيش وعين " ألي وسط المدرسة والى كان فيها جاسم الأنصاري " وكان يقصد النموذجية

وكانت رحيمة يابوك لعائله الدرويش من وطر التومان عطيه من " هدوان " وهبه من الأمير " عبدا لله الفيصل " وكان قبل عبدا لعزيز الله يرحمه وعليها أوراق من وطر التومان وكانت سبخه ما فيها تكرمون غير الإبل والحمير ومن دش رحيمة من الحياوين حده البحر يأكل من الأعشاب ويشرب من عين رحيمة والكل ملفاهم عند العين وماحد يضيع !!!

في الليل نغوص وكنا نسكن شعاب , وذاك الوقت توه طالع العمل يشتغلون ويبغون حصى لدفن فرضه منيفة ورأس تنوره , كانوا يسوون بيوت حق الأمريكان ويسوون مجرى ساب للعين حقت رحيمة ويوصلونها للبحر , وكله على العمال وما كان فيه معدات مثل الحين , ما فيه غير الشياول وصخينات يجبونها من الإحساء " الحسا " وكان السكن بخيام ولافيه لا كهرب ولاشيء.
الكهرب غرشة تعبيها قاز ونحط الفتيلة ونسكرها بتمره ونولعها بالليل ولا دار الصبح كلن " حط ثوبه تحت سرواله " مثل البنطلون هالوقت ...
هههه وهو يطلق ضحكه ولعله ذكر من الماضي الشيء الكثير !!!
نحفر لعمل بورتبلات حق الأمريكان وعمال يمدون الساب حق العين للبحر لأنها ضايقت إلى يسكن برحيمة ومن قربها صابته الحمى









ذاك الوقت ماكو الى أربع أنفار من حقين الحدود ولا سيارات وأرزاقهم تجيهم عن طريق البحر وأذكر منهم " أبو يوسف الشاووش وكان الريس أبورشيد وكانت شغلتهم في الليل يولعون " الفنر " ويعلقونه على حطب طويله بالبحر من شان اهل " المحامل " مايطيحون بالمناطق الخطره ,


لقاء الوالد " سلطان درويش"



لقاء الوالد " سلطان درويش"



لقاء الوالد " سلطان درويش"



لقاء الوالد " سلطان درويش"




========================================

صوره لعين شعاب ..ومسجد شعاب القديم والمهجور !!!







لقاء الوالد " سلطان درويش"


لقاء الوالد " سلطان درويش"



لقاء الوالد " سلطان درويش"



بعدها طلبو توفير حصى من شان يقومون ويدفنون الفرضه والتمت العالم وقامو يجيونك من اهل البحرين والجبيل والدمام ودارين ,,بيدفنون فرضه راس تنوره والمضيق حق راس تنوره من كمب الطليان " اللي فيه خزانات البترول الان " وهو مكان مضيق وكان مكان تلاقى البحر عند " السندى هوك " وكنا نجيب الحصى من البحر شرقي دارين والزور وسنابس , نقص الحصى ونحملها على الجلابيت ومن يجى الليل وتثبر المويه وبالشتاء وسط البطين , البس خيشتك طال عمرك ويحولونا وماتسمع الى صوت الاهياب وهم يقصون الحصى واذا سقت المويه حملوه لراس تنوره والحاله الله اعلم فيها





***********

من أطلال شعاب المتبقيه ..وصوره للمدخل بين المزارع !!



لقاء الوالد " سلطان درويش"



لقاء الوالد " سلطان درويش"



بعدها يابوك صار معمل البويلر ستيم " bioler steam " وسوو مكينه كهرباء وهى البدايه وبعد ماخلص الحصى ومن يجى القيض نغوص بالنهار وكانت الهيرات حق رحيمه مثل
بالعروق ..دويسين ...الجعيليه ..رحيمه ..الجعيمه
نغوص بالنهار وفي الليل نرقد على السيف واذا خلصنا رحنا البر وخذينا حطبنا من الحيش حق الوقيد

كان من أخوياي الله يرحمهم صالح بن سالم وعبدالكريم وحمد ابةخميس وكلهم متوفين الله يرحمهم وهم من اهل دارين

كنا ساكنين شعيب مع خالي والوالد الله يرحمه وكنا نزرع الحب والبصل وبعدها توفى الوالد ورحلنا لدارين وشعيب بعناه على " أحمد الخياط " والظاهر أحمد الخياط باعه على " تركي العطيشان "

شعاب قريب من شعيب وهم بدواه من قبائل المرة والعجمان والهواجر والمناصير وكلن نخله وعششه والصنادق
ومن يجى الشتاء الى عنده غنيمه لاطاح المطر طلعو صوب الجعيليه " اللي هو غزلان الان " وكان با بوك ربيع واحسن من السفانيه والنعيريه , والظليفين مكان فقع والبدو يسكنون بيوتهم من بيوت الشعر ولاجاء القيض عودو على شعاب وعلى بيوتهم وصنادقهم وذاك الوقت رحيمه مافيها أحد وكلها حيش وصباخى وسابات!!

مادرى عن السنه الى نشات فيها رحيمه لكنها نشات عقب ماسوو كمب حق المريكان , بعدين قومو الفنرى " refinery " واول ماسووو كرود يونت نمبر ون " CRUDE UNIT 1
وبعدها نمبر تو وبعدها قامت المعامل كلها مره وحده

أول العمال كانوا من الطليان وماتذكر قبل الحرب ياولدى أو قبله لكن أتذكر " سنه البطاقه " وفيها قل التمر والعيش وكل شيء
كان فيه شويه دريهمات لكن قلت فيه البضائع ,, قريشاتك بمخباك لكن ماتحصل شيء والتمر يجينا من الحسا والقطيف , يجينا تمر من البصرة يجيبونه أهل المحامل ,, واذا حصلت على " قله " تخشها عن أبوك وامك ويالله حق عيالك ...بعدها جتنا باخرة بعيده عن الفرض وعليها حب " يمكن جريش" ولكن والله ماتذكر السنه لكنى كنت بارامكو ويمكن بال 44 م , نشتغل بالنهار عند ارامكو وبالليل ننزل الحب من الدوب وجايبين حماميل من البحرين وهم يحملونها على الدوب وحنا ننزله على الفرض
ذاك الوقت بدأت أول السيارات نشوفها وحنا مستغربين !!!

كيف كانت رحيمة ملك عائله الدرويش !!!؟
كيف حصلنا على الاوراق الثبوتية !!!!!!؟
كيف بيعت رحيمة !!؟

يابوك رحيمه كانت ملك لنا وعليها أوراق ثبوتيه ورحيمه لنا جد عن جد لكن أبوى الله يرحمه مايدرى عنها , ابو أمي مايدرى عنها , أبو أبوى وكل الاوراق عند جدنا " درويش " وذاك الساعه يروح ديار فارس وعنده جلبوت يجيب خيول وطيور من فارس , شيء يبيعه وشيء يهديه على الشيوخ , والعين مشتراه ومن الامير عبدالله الفيصل معطاة قطعه لكن يأبوك ماعرف حدودها .

بعدين كان " بطي بن هادي الهاجري " أبو راشد وسعد الطراف الهاجري كان يسابل البحرين وفيه قهوه يجتمعون فيها الطووايش والنواخذة في المنامه وفيه واحد شيبة من سنابس من قبلى المنامه وقال حق " بطي "
الله يرحمه ماتعرف أحد من أهل الدرويش !!؟
قال: بلا...هذا بيتهم بيتنا
قال: عندى مستخدم " مثل الصندوق الصغير " فيه أوراق وأوراق هامه وأنا مدرى وينهم ؟؟ من عند جدهم يومه يسابر البحر !!!
ومن فضلك تخبرهم لو حصلت حد !!!
بطي خبر أبوى وخالي الله يسكنهم الجنه وراح خالي مع بطي الهاجري للبحرين , شافوا الاوراق عند الشيبة وخذها خالي وطالع الاوراق
اللي فيها ملك " رحيمة "
راح خالي للملك عبدالعزيز الله يرحمه وكتب عليهم تشوفون حدود بن درويش وجاء هنا وعرضها على ابن جلوي بذات الوقت !!
قال ابن جلوي وينكم قبل هالسنين وقبل تبعث ارامكو وقبل تقوم رحيمه وخبرناه بالسالفه وان الاوراق كانت عند واحد بالبحرين من جدنا !!!!

جات ارامكو مع لجنه أو هئيه تكشف عليها وتحدد الاراضي وجاء
·سلمان بن عبدالهادي من أهل صفوى
ال نصر الله من أهل القطيف

ناصر بن لحدان من أهل دارين

ثلاثه أنفار من اللجنه وجاء خالى وقال الجماعه بيجون وبنسوى لهم غداء
ذاك الساعه الاحوال ميسوره ومافيه مواعين ولو فيه شيء من العيش
رحت يابوك للاماره وكان موجود ابن عطيشان وأخذت من عندهم صفريه كبيره وقدر كبير وماقصرو , مريت على " ابن نجم " طباخ عند ارامكو وقلت من فضلك نبيك تطبخ لنا الغداء , أخذت الخروف وانطبخ ويجينا ممثل من ارامكو وناس من الحكومه
المراد انهم خذولهم جوله حوالي 3 ساعات وعقب الظهر جاووو وفرشنا لهم قدام اللينات " أسمه لين الرحمه " شفت البلديه القديمه قبله منها وفيها من أهل حائل وحنا أهل الجبيل وأهل دارين
أنا وجاسم بن هارون ومحمد بن حسن " حق الجبيل " محمد السويدي الله يرحمه وكلنا ساكنيين سواء وكلنا في عزبه
المراد تغدو وعينو خير وراحو وصملو على مئه الف ريال تعويض من عند ارامكو.
قال خالي: هذا مو عطية منكم وهذى مابيها !!
توفى خالي الله يرحمه وراحت الدنيا
بقى خوالي وخالاتي وبقيت أنا وأخوى
حصلو واحد بدوي يقال له " القطبي " وكلوه بالربع رغم ان ذيك المئه الف زاهبه مايبيلها طلبه !!!

خذينا وقت كلمنى خوالي وخالاتي , وقالو بكرة بنجي عند الشيخ
قلت وش عليه !!
قالوا: بنتنازل عن رحيمة ونأخذ فلوسنا من عند ارامكو
قلت يابن الحلال خلوها وخلو رحيمة والمئه الف ريال ماتجيب لكم بيت عقب القسمه وهذا تقريبا بالستينات الميلادية
ظهرت من الغداء, الا الجيب مال الشرطه " الخدام " واقف وكلن معلق بندقه
قال : انت سلطان بن درويش
قلت : نعم
قال: تفضل حياااااا ك وابن عطيشان يبيك
رحت له وقال رح لشيخ يبغاك
رحت الا خوالي وخالاتي والشيخ ذاك الوقت ابن زيد
سلمت ورد عليكم السلام
قال : انت سلطان , قلت نعم
قال: الجماعه بيصادقون على الاوراق
قلت : أسمحلي وامح أسمي من هالورقة واضرب عليه وانا بتنازل عن كل شيء
قال: لالالالالالالا, لازم أولهم انت وأخوك
قلت : ياشيخ خوا تي وخوالي وخالاتي وانا بخير وهم ضعوووف
قال : لالالالا, وانت لازم تنازل عنهم
كانت معاهم أمي الله يرحمها ونقزت وقالت : تنازل عنهم وانت تشتغل ومنعم الله عليك وهذى ماحسبت عليه وقلت الى براسك
مراد قسموها 5000 ريال للرجل و2500 للحرمه
قلت لابن زيد : خل الدراهم عندك , باكر البدو يسمعون ويجونك ,, والله يالربع شهر الا ذاك البدوي جاي ويقول
" بنت أختي ماخذها جدك " وذاك البدوي بعمامته هذا كبرها ولاف بشتة وهو يقول رح معاي لابن عطيشان , قلت يارجال مايحتاج رح لشيخ ابن زيد وعلمه كان لك شيء وتر الدراهم عنده وقول له يعطيك حصتك كان لك شيء
جاء عند ابن زيد وبعدها طرش لي ابن زيد , قلت لابن زيد الله يذكره بالخير فكنى منه, وانا مالحقت لا على جدود ولاغيرهم
المهم ان جاني بالبيت الغداء بارز والعشاء بارز , ولا راح عند ابن عطيشان توسد بشتة وقام " يون " كن مافية شده ولافيه شيء
قلت لابن زيد فكنى من فضلك والله يرحم والديك وانا سامح
خلصنى منه, مراد خلصه وعطاه 3000 ريال وباقي 2000 ريال وقلت خل الباقي عندك باكر يطلع واحد ثاني ,,ههههههه

مراد خذنا 6 أو 7 شهور طرشها على البيت ولكن لو خلوها وقت كان حصلو ملايين , البدوي ذاك الساعه المئه الف يحسبها شيء ولكنه المكتوب وكذا راحت علينا رحيمة وهذي سالفة ملكيتها لابن درويش.

كيف قامت رحيمة ولكن يابوك بدون تواريخ !!!
كيف النشأة؟؟
متى تم بناء البيوت !!؟
الشرطه!!
المحلات التجارية " الدكاكين "

رحيمة أول ماقامت اللينات وبعدين البيوت " المدينه العتيقة " الى عند شارع 49 و50 الى من بنك الراجحى القديم وانت مجنب رايح جنوب, وأول مابدينا أنا ومحمد بن حسن الخاطر ومحمد بن سالم السويدي وعبدالله الزهيران عم الزهيران الي موجودين الان برحيمة, قامو البيوت على حجرتين ومجلس ومنافع اثنين وذاك الوقت الارض يبيعونها بمبلغ 325,25 ريال
كان عثمان بن مبارك الله يرحمه يقول ياسلطان كان عندك دراهم خذلك خمس,ست , عشر ولكن ماكنا يابوك نفكر بالعقار .

عقب مابنينا جاء انجنير engineer وكانه على البناء وجاء عقب
مهندس وقال عثمان بن مبارك البيوت ينهدون لان مالهم أساس وبنيت من جديد وكلن عطوه بيته , عثمان قال بيتى خلوه وخلصو بيوت الجماعه وبعدها بناء بيته الى بشارع 50 مقابل بنك الرياض الى هوده هاليومين.

بيت الضيف قديما ...وحديثا

لقاء الوالد " سلطان درويش"

لقاء الوالد " سلطان درويش"

لقاء الوالد " سلطان درويش"

لقاء الوالد " سلطان درويش"

لقاء الوالد " سلطان درويش"


بعدين كمب المقاولين , وذيك السنه صار الاضراب من شان سالفه السينما وما سينما بعدها سوت ارامكو بيوت صوب بيت بن سلامة الله يرحمه , مبارك بن خالد الي شمال بنك الرياض وسكن فيها " خليفه بن أحمد وجاسم بن هارون وذاك الساعه السيارات قليله والكهرب حق بن حمد الدوسري, يوم تشتغل وعشر متعطله
ذاك الساع ماكو دكاكين غير " العامودي " بعدهم عباس الهندي وابن فياض وابراهيم بن ضعيان وابن زهيران , وكان العامودي الله يرحمه عملته زينه ونيته أزين ومحبوب من أهل رحيمة.

الشرطه كانت في خيمة وفيها الله يرحمه " عابد شيخ " وفيه الهئيه وذولا معهم سالفه , خبرك الراديو ذاك الوقت مافيه الى عند ناس قلال وكان يشتغل بالبطاريه الكبيره واذا جاء العصر شغلناه وجلسنا نسلى روحنا ونسمع " خضيري بوعزيز و ناصر حكيم " وطبت علينا الهئيه ومصعت الواير وحطوه فوق راسنا وشلونا لشرطه ويتحججون علينا وحنا خبرك ضعوف وأكلونا اكل وذاك الساع كلن غشيم وكلن يدور العيشة ولاشفنا العسكري قمنا ننتفض وكانت بالهئيه " الثميرى , الشرياني , الخراز و بعدهم ابن زكري وابوعلي "

اذا رحنا للشغل وصارت سرقه , جابو المريه وحطو رمل وقامو يالله كلن يمشى على الرمل والي خائف يظل بعمله مايطلع والحمد لله وين ذاك الساعه ووين هالساعه , كان الامير تركي ابن عطيشان وبعده الامير صالح وبعدهم جاء السكران الله يذكره بالخير , تركي ودوه لطريف وجاء أخوه صالح وتم مده وبعدها السكران وهو الى طول عندنا وكانت معاملته طيبه مع اهل رحيمة.
الاسواق يابوك صوب الشرطه من جنوب وأغلبهم من أهل القطيف وتم الين أحترق السوق باكمله ولكن والله ماعرف التاريخ ...

شدينا من دارين لرحيمة وأشتغلنا من ذاك الحين الى ذا الحين وكان جيراننا حسن بن مبارك , يوسف النعيمي " ابوابراهيم , عبدالله بن خالد الخاطر , الغنام الله يرحمه , الدخيل " دخيل وسالم شمالينا وعبدالله الفالح نسيب الشويعر , محمد الملا
وكانت رحيمة يابوك من أهل الجبيل ودارين بعدين جوك أهل نجد وأكثرهم من أهل حائل

المستشفى فيه زي البرتبول هالحين قريبه من البيذر وقياسات البترول وكان فيها دكتور هندي يعالج الامريكان والسعوديين وكان فيه لعانه يعطى الى يعرفه راحه وانت لو انك تعبان يقول روح العمل !!!

لا يابوك مافيه مقابر برحيمة وكانو يدفنون بالدمام وصفوي والي بصفوي أول ماتدخل بعد الاشاره على يمينك والمقبره جبليه وقويه ودفنت العود الله يرحمه هناك وخذينا 3 ساعات نحفر اللحد , وذاك الساع طلبت من الهئيه السياره وقالو مالنا غناه عنها , ورحت لسويدي وقلت ابى سياره وقال : بدل الوحده عشر وخذيناها ورحت انا والشروقي ابراهيم وعمران من أهل عمان وسلطان بن سلطان ونروح ندفنه بصفوي الله يرحمة.

لقاء الوالد " سلطان درويش"

***********************

جاسم هارون ..والموتر سيكل!!
جاسم بن هارون ..أزود من أخو !!
السويدي..أنا خذته معاي لمكتب ارامكو !!

مدرى من اول من أشترى سياره لكن أول من أشترى موتر سيكل هو " جاسم بن هارون " وكان أول يشتغل بارامكو والسويدي محمد بن سالم وينا ,
وانا الى أخذت له ورقة من الرئيس وأخذته لظهران بنفسي وخلصناه وتوظف باستور هاوس Storehouse
بد ا السويدي يشتغل باستور هاوس وبعدين ودوه راس تنورة وصار جيد الولد وبعدين عنده بدايه انجليزي وتدخل مع الاجانب
بعدها توافق مع " عبدالله الشويعر ومحمد رضي الاسود " ودشو بالمقاولات وسو شركة واحدة ولكن السويدي ما أستمر وسحب نفسه بعد سنه أو سنتين واشتغل بروحه وياخذ مقاولات وأول ما ابتدا صار تعبان وصار عليه دين ولكن نيته زينته وعزيمته قويه وهو من هو صغير وهو كريم وبعدها توفق ويستاهل وعياله من عقبه وسوا السويدي الكثير بدنياه وبعده عياله والله يرحمه .

المكيف أشتريته من " العامودي " 110 فولت وشريت واحد لاجاء في النهار اجتمعنا فيه وذاك الوقت أبوي و أمي حيين وكان الكيلو بنص ريال وتبع لابن حمد الدوسري والريال ماهو بسيط والمدخول ضعيف وأول ما شتغلنا اربع عشر يوم بتسعه ريالات فضه , والاحوال ميسوره ولكن راحت وانعم الله علينا والحمد لله .

ابن جلوي عندهم وهو شيخهأ وأميرها ووينك ووين السرق !!
كل يوم لاظهرنا العصر عند الدروزاه يفرش , والخضر ملايم عند الدراويز , من يبوق اليوم ثاني يوم يرخونه عند البوابه .

محمد رضي الاسود الله يرحمه كان باسط مجلسه لكل واحد وبيته محل البنك العربي الآن وأخوه بيت عبدالله بن خالد الخاطر الي مشاهد بيت الغنام وصار بيت محمد رضي محل جوازات فيها عبدالعزيز الباحسين جوازات للسعوديين والاجانب , خبرك هل البحرين العمال واجد تبع ارامكو والي تبع المقاول ويعطيك جوازك بساعه وكلها روبيتين وكان فيه سفره وحده بعدها سوواه سنه كامله.

رمضان نهلك , لاطلعنا فيه فرشه والكرفيه وخياش بينهم سكروب . اللي بغينا ندش الشغل نقفل بالخيش ونفتح الماء بالغرفه والا ظهرنا برنوص خفيف الظاهر من الهند ,وقماش رقاق كانه وزار نبخه بالماي وننام واذا نشف ردينا , مو اليوم مكيفات مركزيه وكل واحد ينفخ عليه مكيف والثلاجه قوطى هذا كبره , هههههه ونلفه بخيشه

العيد بعض الاحيان ماندرى عنه الى بعد ساعات او يوم ومره دشينا العمل وبعدها طلعونا وقالو لنا عيد ورحنا نعيد , القل يابوك ومافيه تواصل ومثل يومك جوالات وتلفونات . أجل هالحين تمشي معاك جوالك وتلكم امريكا وانت بالبيت , العيد عند أهلنا والعرضات بدارين والجبيل وأم الساهك والدمام والدوام حتى يوم الخميس ونصف اليوم

المساجد كانت ثلاثة اللي بشارع 49 عند دكان الدوسري , واللي قريب بنك العربي , واللي قريب بيت عبدالرحمن أبوشريفة, هذولا بنتهم الحكومه مع حمامتهم الي هالحين عطاتها البلدية مناقصات لاهل رحيمة !

مادرسنا ويننا ووين الدراسه والانجليزي ولو انهم ماقصرو ولكن ماحنا حول الدراسه والانجليزي , لاهين بالكيرم , الضومنه , الورقه , نلعب ونسهر عليها وبعدها الغبقه وضرب الخمس ...وينك يابوك ووين الانجليزى , كان عثمان بن مبارك هو المترجم حق السعوديين وخبرك العور عند العميان باشا,,هههههههه

راحت الايام وطلع من رحيمة من طلع وبقى البعض, أذكر عبدالرحمن الخلف من أهل البحرين وهذا أخو ومحمد السويدي , جاسم بن هارون وهذا أزود من أخو , عيال الخاطر . حسن بن مبارك , على بن أحمد الخاطر .

ترانيم من أبوخالد
لقاء الوالد " سلطان درويش"

شهادة شكر وتقدير من دارة الملك عبدالعزيز

لقاء الوالد " سلطان درويش"




* أروح للفريق الاول ومحلى هناك وأتحسر على القديم ورجال أول , يابوك ه الوقت قلت الشيمة والقيمة

*مخبز "عبدالقادر مكي" أول مخبر برحيمة

*العمالة من أهل عمان " أهل مسكت " مسقط وهم طيبين ونيتهم بيضاء !!

*حاره زعل هذي أروح أنا وسلطان بن سلطان وحميد وساعات سعد بن غنيم , نروح كشته يوم او يومين , حداق ونكب سم , والجزيره ديرها البحر , نشوي من السمك ونطبخ من العيش وعندنا خويمة ننشرها هناك والمرقد خبرك أفرش وزارك والمخدة رمل ...

·ماكو ثياب وماكو خياطين والخياطين بتا روت والقطيف

·الماء البارد عند الامريكان والاكل الزين عندهم وحنا عمال نش, نشتغل براء واذا بغينا الماء بالسرق , كان عندهم واتر كولر Water cooler داخل مكاتبهم والحال حال والله أعلم فيها

·الله يحييكم وهالساعه المباركة



التوقيع

منتديات رحيمة

منا ... وفينا
12 سنه في خدمة رحيمة

للاشتراك في واتس اب منتديات رحيمة

ارسل كلمة اشتراك للرقم

0500331566

التعديل الأخير تم بواسطة رحيمة ; 22 / 03 / 2010 الساعة 19 : 12 AM.
إدارة المنتدى غير متصل  
قديم 18 / 03 / 2010, 03 : 03 PM   #2
مبدع
 
الصورة الرمزية حطام الماضي
 
تاريخ التسجيل: 25 / 01 / 2004
رقم العضوية: 45
الدولة: وسط كوووووخي
المشاركات: 18,224
حطام الماضي is on a distinguished road


جهود جبارة
تنشكر اداره المنتدى ولكل من قام بانجاح هذا اللقاء
ودام هذا التواصل
والجميل بلقاء هو اختيار رجل يملك ارشيف ثري
بتاريخ رحيمة وماحولها وايضا ترعرعه مابين رحيمه
وشعاب ودارين وعودته الى رحيمة.

الله يعطيه الصحه والعافيه
حفظه الله

التوقيع
لن ننساك
حطام الماضي غير متصل  
قديم 18 / 03 / 2010, 29 : 03 PM   #3
اللهم اعز الاسلام
 
الصورة الرمزية غند
 
تاريخ التسجيل: 04 / 05 / 2007
رقم العضوية: 3400
المشاركات: 12,309
غند is on a distinguished road

اطال الله عمره على طاعته...

عبق ماضي جميل....

فعلا حياة قاسيه...زرعوا لنحصد..فجزاهم الله عنا خير الجزاء

التوقيع
يارب .
ارحم ضعفنا. وفرج همنا واشفي مريضنا.
اللهم اجبر كسرهم وكسرنا ورزقها الفردوس
غند غير متصل  
قديم 18 / 03 / 2010, 54 : 03 PM   #4
في صمتي كلام
 
الصورة الرمزية ابتسامتي تكفي
 
تاريخ التسجيل: 07 / 11 / 2006
رقم العضوية: 2551
المشاركات: 5,483
ابتسامتي تكفي is on a distinguished road

لقاء ممتع من الماضي

التوقيع
ابتسامتي تكفي غير متصل  
قديم 18 / 03 / 2010, 27 : 04 PM   #5
مبدع
 
تاريخ التسجيل: 25 / 01 / 2005
رقم العضوية: 1036
المشاركات: 917
شقردي is on a distinguished road

كل الشكر لإدارة المنتدى على ها اللقاء الجميل

شقردي غير متصل  
قديم 18 / 03 / 2010, 54 : 05 PM   #6
قلم جاد
 
تاريخ التسجيل: 26 / 08 / 2009
رقم العضوية: 20430
المشاركات: 200
مدام نهى is on a distinguished road

ذكر علينا رحيمه واهلها الطيبين راحوا وذكرهم باقي الله يعطيك الصحه والعافيه ويمد في عمرك

مدام نهى غير متصل  
قديم 18 / 03 / 2010, 58 : 05 PM   #7
مبدع
 
الصورة الرمزية حطام الماضي
 
تاريخ التسجيل: 25 / 01 / 2004
رقم العضوية: 45
الدولة: وسط كوووووخي
المشاركات: 18,224
حطام الماضي is on a distinguished road




نتمنى من جميع الاعضاء التفاعل وطرح كلمه بحق هذا الرجل الذي وضع بين ايديكم تاريخ الماضي وسواليف الاجداد ولم يبخل على المنتدى بالاجابه على جميع الاسئله المطروحه وايضا بحق اداره المنتدى التى بذلت الجهد لاخراج هذا الموضوع ووضعه أمامكم بالحرف والصوره .

اتمنى ان لايكون المرور فقط وانما الرد والتفاعل ولكم جزيل الشكر .

التوقيع
لن ننساك
حطام الماضي غير متصل  
قديم 18 / 03 / 2010, 01 : 06 PM   #8
مبدع
 
الصورة الرمزية حطام الماضي
 
تاريخ التسجيل: 25 / 01 / 2004
رقم العضوية: 45
الدولة: وسط كوووووخي
المشاركات: 18,224
حطام الماضي is on a distinguished road

الاخت . غند , ابتسامتي تكفي
الاخ . شقردي
الاخت . مدام نهى

شكرا لمروركم العذب وحضوركم المشرف وحرفكم المشرق

التوقيع
لن ننساك
حطام الماضي غير متصل  
قديم 18 / 03 / 2010, 03 : 06 PM   #9
معاند الشيوخ
 
تاريخ التسجيل: 28 / 01 / 2004
رقم العضوية: 57
الدولة: United States
المشاركات: 9,811
معاند جروحه is on a distinguished road

استمتعت فعلا بهذا اللقاء .... سوالف الماضي ماتنمل

اعجبتني قصه تعويض ارامكوا صراحه ... والبدوي اللي جا يوم درا عن الفلوس ههههه

الله يطول بعمر الوالد سلطان ... فعلا اثرانا بعبق الماضي من مايحمله في جعبته وذاكرته

وكل الشكر والتقدير للاداره على المجهود الجبار واللقاء الممتع والشيق

تحياتي

التوقيع

SOLID SNAKE

معاند جروحه غير متصل  
قديم 18 / 03 / 2010, 24 : 06 PM   #10
RELAX
 
الصورة الرمزية ريلاكس
 
تاريخ التسجيل: 13 / 06 / 2009
رقم العضوية: 19123
الدولة: فوق الارض وتحت السماء
المشاركات: 1,741
ريلاكس is on a distinguished road

كل الشكر
لااداره المنتدى وللضيف الكريم
الوالد
سلطان درويش الهاجري ..... الله يطول بعمره
نعم هنا الماضي والحاضر ... وهذه رحيمه وستبقى رحيمه ووفيه باهلها

ريلاكس غير متصل  
 

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
"الغذاء والدواء" للمستهلكين: لا تشربوا مياه "الشرقية" و "قباء" و "الندى" أم الرمادي عالم الاسرة والحياة 3 24 / 01 / 2010 55 : 03 PM
من كلمات "شاعرنا " حبيبنا سلطان ... أم الرمادي مشاعر وشعراء 31 20 / 12 / 2009 21 : 04 AM
3000 دولار "عيدية" من سمو الأمير سلطان لكل طالب سعودي في أمريكا أم الرمادي الأخبار 1 10 / 12 / 2008 23 : 09 AM
"المظبي" و"المندي" و"الحنيذ" تسبب السرطان الخطير ديوانية رحيمة 11 12 / 10 / 2006 12 : 03 AM



الساعة الآن 54 : 01 PM


Powered by vBulletin® Version 3.8.7
Copyright ©2000 - 2016, Jelsoft Enterprises Ltd
Ads Management Version 3.0.1 by Saeed Al-Atwi
لا تتحمّل منتديات رحيمة أيّة مسؤوليّة عن المواد الّتي يتم عرضها أو نشرها في المنتدى. ويتحمل الكتاب بالتالي كامل المسؤولية عن كتاباتهم وإدراجاتهم التي تخالف القوانين

Security team